ការផ្ទុះឡើងនៃជំងឺកូវីដ-១៩ បានជះឥទ្ធិពលដល់សេដ្ឋកិច្ចពិភពលោក ហើយការកើនឡើងនៃវិបត្តិនេះកំពុងប៉ះពាល់ដល់ប្រទេសកំពុងអភិវឌ្ឍន៍មិនត្រឹមតែទៅលើភាពអាសន្នផ្នែកសុខភាពប៉ុណ្ណោះទេ ប៉ុន្តែថែមទាំងបានបំផ្លាញដល់ការអភិវឌ្ឍសង្គម និងសេដ្ឋកិច្ចដល់ប្រទេសទាំងនោះយ៉ាងធ្ងន់ធ្ងរផងដែរ ។
ដូចគ្នានេះដែរ បណ្តាប្រទេសសមាជិកអាស៊ានទាំងអស់កំពុងរងនូវផលប៉ះពាល់ផ្នែកសេដ្ឋកិច្ច និងសង្គមពីជំងឺកូវីដ-១៩ ខណៈការផ្ទុះឡើងនៃជំងឺនេះជាសកល បាននាំឱ្យមានការរំខានដល់ខ្សែសង្វាក់ផ្គត់ផ្គង់ និងបង្កជាការរាំងស្ទះទៅដល់តម្រូវការ ព្រមទាំងលំហូរនៃការធ្វើដំណើរ ពាណិជ្ជកម្ម និងការវិនិយោគ ដែលជាហេតុបាននាំមកនូវការរំខានទៅលើគ្រប់វិស័យនៃសកម្ម ភាពសេដ្ឋកិច្ចនៅក្នុងបណ្តាប្រទេសអាស៊ាន ក្នុងនោះរួមទាំងប្រទេសកម្ពុជាផងដែរ ។
#ជះឥទ្ធិពលដល់វិស័យអចលនទ្រព្យ
នៅក្នុងឆ្នាំ២០២០កន្លងទៅនេះ សម្រាប់វិស័យអចលនទ្រព្យនៅកម្ពុជាត្រូវបានអ្នកជំនាញអះអាងថាទទួលរងផលប៉ះពាល់ធ្ងន់ធ្ងរជាងវិបត្តិសេដ្ឋកិច្ចកាលពីអំឡុងឆ្នាំ២០០៨ ប៉ុន្តែភាពអវិជ្ជមានទាំងនេះ អាចនឹងវិលត្រឡប់មករកភាពល្អប្រសើរវិញក្នុងរយៈពេលដ៏ខ្លី ក្រោយពីបញ្ចប់វិបត្តិជំងឺឆ្លង Covid-19 នៅពេលខាងមុខនេះ ។
វិស័យអចលនទ្រព្យនៅកម្ពុជាក្នុងឆ្នាំ២០២០កន្លងទៅនេះនឹងទទួលរងនូវផលប៉ះពាល់ធ្ងន់ធ្ងរជាងកាលពីអំឡុងឆ្នាំ២០០៨ទៅ ទៀតដោយសារតែវិបត្តិមួយនេះបានជះឥទ្ធិពលយ៉ាងទូលាយ និងទាញទម្លាក់កំណើនសេដ្ឋកិច្ចពិភពលោកឱ្យធ្លាក់ចុះយ៉ាងខ្លាំង ។ ការទទួលរងនូវផលប៉ះពាល់ទាំងអស់នេះមិនមែនកើតមានតែនៅកម្ពុជា ឬនៅក្នុងតំបន់នោះទេ ប៉ុន្តែវាបានកើតឡើងជាសាកល ដែលស្ទើរតែគ្មានប្រទេសណាមួយអាចគេចផុតនោះទេ ។
នៅក្នុងស្ថានការណ៍ដែលកំពុងតែទទួលរងនូវផលអវិជ្ជមាននេះ អ្វីដែលត្រូវធ្វើ សម្រាប់អ្នកស្ថិតនៅក្នុងវិស័យអចលនទ្រព្យគឺចាំបាច់មានការរៀបចំផែនការនៃចរន្តសាច់ប្រាក់ឱ្យបានត្រឹមត្រូវ ដើម្បីត្រៀមទុកជួសជុលនូវកន្លែងខ្វះខាត និងអាចដំណើរការវិនិយោគបន្តក្រោយពេលវិបត្តិមួយនេះបានបញ្ចប់ ។
កាលពីអំឡុងឆ្នាំ២០០៨ វិស័យអចលនទ្រព្យនៅកម្ពុជាធ្លាប់ទទួលរងនូវផលប៉ះពាល់ផងដែរ ដែលបណ្តាលមកពីវិបត្តិសេដ្ឋកិច្ចពិភពលោក ហើយត្រូវពន្យាពេលប្រមាណ៤ឆ្នាំក្នុងការជួសជុល និងស្ដារវិស័យអចលនទ្រព្យឱ្យត្រឡប់មករកភាពល្អប្រសើរវិញបាន ។
#តើពេលវេលាណាទើបស័ក្តិសមក្នុងការវិនិយោគលើវិស័យអចលនទ្រព្យឡើងវិញ?
បន្ទាប់ពីទទួលរងនូវផលប៉ះពាល់យ៉ាងដំណំពីវិបត្តិសេដ្ឋកិច្ចសាកលដែលបណ្តាលមកពីជំងឺឆ្លងនៅក្នុងឆ្នាំ២០២០ សម្រាប់ឆ្នាំ២០២១នេះអ្នកជំនាញនៅក្នុងវិស័យអចលនទ្រព្យបានអះអាងថា វាគឺជាពេលវេលាដ៏ល្អមួយ ចំពោះអ្នកដែលមានលុយគ្រប់គ្រាន់វិនិយោគ ក៏ដូចជាធ្វើការអភិវឌ្ឍគម្រោងរបស់ខ្លួនបានយ៉ាងល្អប្រសើរបំផុត ។
ឆ្នាំ២០២១ គឺជាពេលវេលាមួយដែលស័ក្ដិសមបំផុត សម្រាប់អ្នកដែលមានដើមទុន និងចរន្តសាច់ប្រាក់គ្រប់គ្រាន់ក្នុងការវិនិយោគ ឬចាប់ផ្តើមអភិវឌ្ឍន៍គម្រោងរបស់ខ្លួន សម្រាប់ដាក់បញ្ចូលទៅក្នុងទីផ្សារនៅអំឡុងចុងឆ្នាំ២០២១ ឬដើមឆ្នាំ២០២២ បន្ទាប់ពីវិបត្តិនៃជំងឺត្រូវបានបញ្ចប់ក្រោយមានការប្រើប្រាស់វ៉ាក់សាំងជាសាកល ។
#ផលប៉ះពាល់ផ្នែកសេដ្ឋកិច្ច
ជំងឺកូវីដ-១៩ បានគម្រាមកំហែងយ៉ាងខ្លាំងទៅលើសកម្មភាពសេដ្ឋកិច្ចទៅលើវិស័យផ្សេងៗនៃការអភិវឌ្ឍរបស់ប្រទេសកម្ពុជា ខណៈដែលវិស័យទេសចរណ៏ ផលិតកម្មសម្រាប់ការនាំចេញ និងវិស័យសំណង់ត្រូវបានគេមើលឃើញថាជាវិស័យដែលបានរងផលប៉ះពាល់ខ្លាំងបំផុត ។
ជាការពិត នៅពេលរួមបញ្ចូលគ្នាវិស័យទាំងបីខាងលើនេះបានចូលរួមចំណែកច្រើនជាង ៧០ ភាគរយនៃកំណើនសេដ្ឋកិច្ចរបស់ប្រទេសកម្ពុជា និងបង្កើតការងារប្រហែលជា ៣៩,៥ ភាគរយនៃការងារសរុបកាលពីឆ្នាំ ២០១៩ កន្លងទៅនេះ ។ វិធានការណ៍ឆ្លើយតបជាសកលដើម្បីទប់ស្កាត់ការរីករាលដាលនៃមេរោគនេះ ជាក់ស្តែងបានបង្កឱ្យមានការធ្លាក់ចុះនៃសេវាកម្មទេសចរណ៍ និងបដិសណ្ឋារកិច្ច ។
ជុំវិញការព្យាករណ៍កំណើនសេដ្ឋកិច្ចមុនពេល និងក្រោយពេលការផ្ទុះឡើងនៃជំងឺកូវីដ-១៩ ត្រូវបានគេមើលឃើញថា មានភាពខុសគ្នាទៅតាមស្ថាប័នផ្សេងៗគ្នា រួមមានការព្យាករណ៍របស់រាជរដ្ឋាភិបាលកម្ពុជាផងដែរសម្រាប់ឆ្នាំ២០២០ និង២០២១ ដូចដែលបានបង្ហាញក្នុងតារាងខាងក្រោម ៖
#ប៉ះពាល់ខ្លាំងលើវិស័យទេសចរណ៍
បើយោងតាមរដ្ឋមន្ត្រីក្រសួងទេសចរណ៍បានឱ្យដឹងថា កាលពីឆ្នាំ២០២០កន្លងទៅនេះ ប្រទេសកម្ពុជាត្រូវបានគេប៉ាន់ប្រមាណថា នឹងខាតបង់ប្រាក់ចំណូលពីវិស័យទេសចរណ៍ប្រមាណជា ៣ ពាន់លានដុល្លារ ។
លោកបានបន្តទៀតថា ក្នុងរយៈពេល៤ខែដំបូងភ្ញៀវទេសចរណ៍បរទេសប្រមាណជា ១,៦ លាននាក់បានមកទស្សនាប្រទេសកម្ពុជាដែលជាតួលេខបង្ហាញពីការធ្លាក់ចុះ ៥២ ភាគរយបើប្រៀបធៀបនឹងរយៈពេលដូចគ្នាកាលពីឆ្នាំមុន ។ លើសពីនេះ គោលដៅទេសចរណ៍ដែលមានអ្នកទេសចរមកទស្សនាច្រើនជាងគេក្នុងប្រទេសកម្ពុជាគឺខេត្តសៀមរាប ត្រូវបានកត់សំគាល់ពីការធ្លាក់ចុះនៃចំនួនភ្ញៀវទេសចរស្មើនឹង ៤៥,៦ ភាគរយ និងការធ្លាក់ចុះរហូតដល់ទៅ ៩៩,៦ ភាគរយ សម្រាប់ខែមេសាឆ្នាំ ២០២០ បើប្រៀបធៀបនឹងរយៈពេលដូចគ្នាកាលពីឆ្នាំមុន។
អាជីវកម្មដែលទាក់ទងនឹងវិស័យទេសចរណ៍ចំនួន ២.៩៥៦ ត្រូវបានបិទទ្វារ ដែលបណ្តាលឱ្យអត្រាភាពគ្មានការងារធ្វើមានចំនួន ៤៥.៤០៥ នាក់6 ខណៈពេលដែលការប៉ាន់ស្មានពីធនាគារពិភពលោក (World Bank) បង្ហាញថា ជាសាកលយ៉ាងហោចណាស់មានការងារចំនួន ១,៧៦ លានកន្លែងកំពុងប្រឈមនឹងការបាត់បង់ ។
ការធ្លាក់ចុះនៃសេដ្ឋកិច្ចនេះដោយសារតែផលប៉ះពាល់នៃការរីករាលដាលនៃជំងឺកូវីដ-១៩ និងមួយផ្នែកទៀតដោយសារតែការធ្លាក់ចុះសេដ្ឋកិច្ចនៃប្រទេសមានសេដ្ឋកិច្ចជឿនលឿន និងសាធារណរដ្ឋប្រជាមានិតចិន បូករួមជាមួយនឹងការធ្លាក់ចុះសមត្ថភាពនាំចេញទៅកាន់ទីផ្សារនាំចេញទៅអ៊ឺរ៉ុប នេះបើយោងតាមធនាគារអភិវឌ្ឍន៍អាស៊ី ។
#ជះឥទ្ធិពលលើការប្រកបការងាររបស់ប្រជាជន
យោងតាមក្រសួងការងារ និងបណ្តុះបណ្តាលវិជ្ជាជីវៈ រោងចក្រសរុបចំនួន ៤៣៣ និងអាជីវកម្មដែលទាក់ទងនឹងវិស័យទេសចរណ៍នៅទូទាំងប្រទេសបានបិទទ្វារជាបណ្តោះអាសន្ន ។ ការបិទទ្វារជាបណ្តោះអាសន្ននេះ បានធ្វើឱ្យកម្មករកាត់ដេរប្រមាណជា ១៣៥.០០០ នាក់ និងកម្មករទេសចរណ៍ ១៧.០០០ នាក់គ្មានការងារធ្វើ ។
ចំពោះប្រទេសកម្ពុជា ស្ថានភាពកាន់តែមានលក្ខណៈពិបាកនៅក្នុងវិស័យសេដ្ឋកិច្ចក្រៅប្រព័ន្ធ ពីព្រោះកម្មករកាត់ដេរបានរួមចំណែកខ្លាំងក្នុងការជំរុញសេដ្ឋកិច្ចទៅដល់អ្នកលក់អាហារតាមចិញ្ចើមថ្នល់ ហាងកាត់សក់ និងអ្នកផ្តល់សេវាដឹកជញ្ជូន ។
ឆ្លងតាមការសិក្សាកន្លងមកបានប៉ាន់ប្រមាណថា ប្រាក់ឈ្នួលដែលកម្មករទទួលបាននៅក្នុងវិស័យកាត់ដេរអាចគាំទ្រសកម្មភាពសេដ្ឋកិច្ចមនុស្សពី ៥ ទៅ ៦ នាក់ក្នុងវិស័យសេដ្ឋកិច្ចក្រៅប្រព័ន្ធតាមរយៈការជំរុញសេដ្ឋកិច្ចក្នុងស្រុក ។
ដូច្នេះភាពអត់ការងារធ្វើរបស់កម្មកររោងចក្រប៉ះពាល់ដល់អ្នកដែលមានសេដ្ឋកិច្ចក្រៅប្រព័ន្ធ ។ ដូច្នេះភាពអត់ការងារធ្វើរបស់កម្មកររោងចក្របានធ្វើឲ្យប៉ះពាល់បន្តដល់អ្នកប្រកបរបរនៅក្នុងសេដ្ឋកិច្ចក្រៅប្រព័ន្ធគួរឱ្យកត់សម្គាល់ ៕
អត្ថបទដោយ ៖ សំណាង
0